Կարեն Ավագյանը ֆեյսբուքյան իր էջում գրել է. «Հարգելի հայրենակիցներ վերջապես լսեք ճշմարտությունը:Քաղաքացու օր կարող է տոնել պետություն ու հաղթանակներ չունեցո մարդը:
Մարդը, որն իր ապրած հավաքական միջավայրում չի հասել ոչ հաղթանակի, ոչ էլ ունի տոնելու այլ առիթ:
Այն քաղաքացին ով ունի երջանկություն նշելու իր պետության անկախության տոնը, իր հայրենիքի սրբազան հատվածի ազատագրման օրը, իր ձեռքով կերտած բանակի օրը չի կարող դրանք ստորադասել քաղաքացու օրվան, որովհետև այդ բանակի, այդ պետության ու այդ հայրենիքի տոները այդ քաղաքացունն են:
Քաղաքացու օրը ստեղծեցին ու տոնեւմ են մի նպատակով: Ձեզ զատել ձեր երկրի հաղթանակներից, ձեզ առանձին դնել ձեր բանակից ու պետականությունից: Քաղաքացին իր սահմանադրական իրավունքներով ամեն օր տոնում է իր հաղթանակը, քանի որ ի հեճուկս թշնամիների դավերի ինքը ամեն օր պահում է իր պետություն, որտեղ քաղաքացի կոչվելու պատիվն ունի:
Մեզ թուրքահպատակ դարձնողները մեզ ուզում են քաղաքացու օրով խաբել: Առանց մտքի՝ քաղաքացին ով է։ Թուրքի հպատակ քաղաքացին է, թե Երևանը ադրբեջանցուն նվեր տվող անկամք քաղաքացին:
Քաղաքացու իրական տոնը իր պետության օրն է»:
Հիշեցնենք, որ այսօր
Նիկոլ Փաշինյանն ուղերձ է հղել Քաղաքացու օրվա առթիվ: Ուղերձում ասված է.
«Հայաստանի Հանրապետության սիրելի քաղաքացիներ, ջերմորեն շնորհավորում եմ բոլորիս Քաղաքացու օրվա առիթով:
Այս տոնը ամրագրվեց՝ արձանագրելու ժողովրդավարական պետության կարևորագույն ինստիտուտի՝ Քաղաքացու առանցքային դերակատարումը պետության կայացման և զարգացման գործում:
2018 թվականին տեղի ունեցած Ոչ բռնի, թավշյա, ժողովրդական հեղափոխությունը Քաղաքացու իշխանության հաստատման խորհրդանիշն է Հայաստանում և այդ արժեքն անշրջելի է ու անսասան:
Ընտրությունների կեղծման և այսպիսով Քաղաքացուն որոշումներ կայացնելու սահմանադրական իրավունքից զրկելու էջը մնացել է անցյալում և Հայաստանն այլևս ամբողջ աշխարհում ընկալվում է որպես ընտրական ժողովրդավարությամբ երկիր:
Նաև այն պատճառով, որ 2020 թվականի 44-օրյա աղետաբեր պատերազմից հետո առաջին հերթին Քաղաքացին ոչ միայն թույլ չտվեց իր պետության քաոսացումը, այլև ետպատերազմյան դժվարագույն ժամանակահատվածում բարձրացրեց մեր երկրի ժողովրդավարական համարումը: Սիրելի ժողովուրդ, Հայաստանի Հանրապետության հպարտ Քաղաքացիներ,
Մենք անցել ենք ու անցնում ենք աննկարագրելի, երբեմն՝ ուղիղ ասենք, անտանելի դժվարություններով: Ամեն օր, ամեն ժամ, ամեն քայլափոխի մեզ փորձում են ախտահարել կասկածի ու երկմտանքի վարակով, փորձ են անում սասանել մեր հավատը մեր անցյալի ու ապագայի և որ առավել կարևոր է՝ մեր առաքելության նկատմամբ:
Կոչ եմ անում, խնդրում եմ բոլորիդ, պահանջում եմ բոլորիցդ. մի երկմտեք, մի կասկածեք. մենք մեր երկրի վրա թափված աղետների հեղինակը չենք, մենք արժանացել ենք դաժան ճակատագրի ու սրբագույն առաքելության. առաջնորդել մեր հայրենիքը անխուսափելի և երկար տարիներ բոլորիս աչքի առաջ նյութված աղետների միջով և նրան հասցնել խաղաղ, բարեկեցիկ, երջանիկ ապագայի:
Ու այս ճանապարհին մեր ծնկները չեն ծալվել ու չեն ծալվելու: Հիմա առավել քան երբևէ համոզված եմ. մենք ընթանում ենք ճիշտ ճանապարհով և փոթորկված օվկիանոսի մեջ հայտնված մեր նավը հասցնելու ենք խաղաղ հանգրվանի:
Եւ ուրեմն՝ Կեցցե Ազատությունը, Կեցցե Հայաստանի Հանրապետությունը,
Կեցցեն մեր երեխաները, որ ապրելու են Ազատ և Երջանիկ Հայաստանում:
Հավերժ փառք մեր նահատակներին»: